2Ti 2 | PMA | STEP | Timoti, natkuli, kihatuk hekeih hetal min kataunien koa Iesu Kristo mul sani minir.

2 Timothy 2

Pol Viteni min Timoti Vit Hehati Hekeih

1 Timoti, natkuli, kihatuk hekeih hetal min kataunien koa Iesu Kristo mul sani minir. 2 Hihiseien koa koraengoni naviteni min meatin keil, kikuri ka kihiseini min koakeil desien onom mul en keil. Hesakini, keil emun ilea ihisein meatin sav keil.

3 Kihatuk hekeih en sakvisien keil onen Ahi. Kisuval meatin tavaeen tetahos onen Iesu Kristo. 4 Navong meatin tavaeen mul mum, kei romaen etai tounah ten out netan valeh rendemien onen vaha ran umen onen, veni envat asuv onen vakur sien ven umen onen. 5 Kisuval meatin emun koa mul en lohloh retavoaien tai. Meatin enek heloh housil sakien keil ten lohlohien enek. Munak hermusil vasitei, sakras vakur uite teni. 6 Tamun, kisuval meatin ten ah. Veni meatin koa avetin kuri en ah, kei kilea hekur aneite rani helamu en meatin sav keil. 7 Tatavolien keitel ekek koa naviteni minuk, kindem usili. Hemukonek, Ahi houmonuk kilea revi aneite teni.

8 Kindem kat Iesu Kristo: koa moul eris ran matien, ka koa kistal ran ara onen Asuv Houlu Deved. Koanik vi vatte ten more longlongien koa namul navitehiteni. 9 Ven more longlongien enek, nakur mahien ka apar katnau en viau takeih suval tarhena tai. Ka asakras avapar kat selusien onen Ahi va mukonek. 10 Sakini, nakilea makur mahien vasi keil vasakin koakeil Ahi rie lat keil availea avakur moulien hau koa ka ven Iesu Kristo. Mukonek, akilea avato en muohien hetal mini lisenges. 11 Usil rendemien koanik, selusien ekek vi anatin koa vit:

Munak romat ral min Iesu Kristo,
rehemoul hetal mini.
12 Munak rehehat ir hekeih lises ven isen,
rehelosil kat out netan hetal mini.
Munak rehehit roreingeingeni,
kei mun hehit reingeingen ir.
13 Ka heisavos rehehiles eisilir rani,
kei sakras vahiles eisilin ranir,
veni kei sakras vahilehiles ran hatkatien keil onen.

Meatin Toumien Tetahos Onen Iesu Kristo

14 Tahos keke lises, kiles kihisein meatin keil en hihiseien keil enek. Kisel kat keil en isen Ahi anoumontei rea usil aneite ten titi selusien heisav keil. Vati sakien enek sakras voumon etai tounah vatahos. Sakien enek mul purun meatin keil koa amul araengoni. 15 Sakini, keik, Timoti, kum hetahos navong komul kovisein meatin keil en selusien ten anatinien onen Ahi. Hesakini kokilea kovalomal en meten Ahi suval meatin toumien koa romemoutei ven umen onen. 16 Ka konapiltei natal koakeil selusien one vi heisavos ka romemaltei. Ven koakeil aselus mukok, umai amusil tisaen keil houlu vis avi houlu mok. 17 Ka hihiseien one mul purun rendemien onen meatin keil suval manu tai koa mul kan vasi aven meatin. Meatin elu koa luvi vati meatin koa lumukonek luvi Haemeneas ka Faelitas. 18 Keilu luleras sise ten anatinien veni lumul lupurun demkatien onen meatin sav keil navong luvisein keil luvit avong ten meatin keil onen vahina en out nesa kur out tuai. 19 Ka heisavos amumoni mukonek, asakras avapurun koakeil onen Ahi. Veni Ahi vat kati tuai meatin keil ten sukul onen avalomal vakeih en Iesu Kristo koa suval simen ten eim koa amumoni netan. Ka Ahi mutis selusien koanik eni koa vit, “Ahi Asuv kilea isei keil avi onen,” ^{▼▼2:19Num 16:5} ka mutisi mun vit, “Koakeil avit avousil Ahi Asuv ilokovein sakien tatisa keil one.” ^{▼▼2:19Vesesal selusien koa mul en Isa 52:11}

20 Koanek suval mari eim tai koa tre ka pelet houlu amul ien. Tre koan, amumoni en tounah koa merendas, suval silva ka gol; ka koan, amumonis en ai ka tanvili. Koan, ten tounah koa tahos, ka koan, ten tounah koa tisa. 21 Usil rendemien koanek, munak meatin tai mumon kei mutolas ran sakien tatisa keil, Ahi hekur kati ven umen tetahos koa rie lati veni. Ka ven kei san moulien onen min Ahi ka sak mesen kei tahos, Asuv kilea vakur kati ka voumon more umen vasi keil eni. 22 Sakini, keik Timoti, kilokovein sakien tatisa keil koa litetai keil amusili. !Anatin! Keik hetal min koakeil aretengeiril min Ahi ral min rendemien koa mutolas, kami miheloh mivakur sakien ten maluen, sakien ten demkatien, sakien ten envatien, ka sakien ten tomat hel en moulien onami. 23 Kiha seh ran koakeil aselus retavoai houlu en tounah koa vi heisav, veni kokilea vati selusien koanek mul mumon rea enges. 24 Ka keik kovi meatin toumien tai onen Ahi. Sakini, konaseltei natal min meatin sav keil. !Vuo! Keik, kitahos min meatin vasi keil, ka kihuli kat tinom. 25 Koakeil aselus kekarenuk, kihisein keil en sakien ten merauen. Nahi Ahi houmon keil ihiles ran tisaen one ka imai ilea anatinien onen. 26 Hesakini, keil imai ris en rendemien tetahos ka ilohosai ran sakat koa Temat vuli kat keil eni. Temat vuli kat keil veni envati keil avoumon asa kei envati.